43 urteko gizon bat atxilotu zuen Ertzaintzak iragan ostegunean Orozko parean, AP-68 autobidean. Poliziak gaur eman du atxiloketaren berri, prentsa ohar baten bidez. Azaldu dutenez, urtarrilean ekin zioten Bilbon bizi den pertsona hori ikertzeari, droga trafikoan aritu ahal zela uste zutelako.
Hain zuzen, "ustez kokaina zuten bi pakete" topatu zituzten autoaren barruan, bi kilo guztira. Horrez gain, 11.000 euro ere topatu zituzten ibilgailuan. Gauzak hala, gizona atxilotu zuten.
Ostiralean atxilotuaren etxera jo zuten poliziek, epailearen aginduarekin. "Miaketan Txakur Unitateko ertzainek parte hartu zuten, eta 3,6 kilo haxix, nahasteko substantzia baten kilo eta erdi, marihuana-kukuluak zituen pote bat, bi doitasun-balantza eta 6.000 eurotik gora aurkitu zituzten. Gainera, munizioa eta balen kontrako txaleko bat ere konfiskatu zituzten", azaldu dute prentsa oharrean.
Trasteleku bat ere miatu zuten. Bertan topatu zituzten "guztiz operatibo zegoen errebolber bat", kokaina eta munizio gehiago. Horrez gain, prentsa hidrauliko industrial bat eta molde bat ere aurkitu zituzten, "ustez droga manipulatzeko erabiliak".
Gauzak hala, droga trafikatzea eta armak legez kanpo izatea leporatu zioten atxilotuari, eta larunbatean utzi zuten epailearen esku. Honek espetxealdi prebentiboa ezarri zion gizonari, eta Basauriko kartzelara bidali zuen.