Omenaldi jendetsua egin diote gaur eguerdian Angel Egaña eusko gudariari bere herrian, plazan, hain zuzen. Indar abertzaleen ordezkaritza zabala egon da bertan (Orozko, Laudio, Urduña edota Ugaoko alkateak, Julen Arzuaga legebiltzarkidea...) eta Aintzane Ezenarro Gogora Institutuko zuzendariak ere hartu du hitza.
Txutxi Ariznabarreta alkateak aurkeztu du ekitaldia eta inguruko dantzariek eta musikariek ere parte hartu dute.
Egañaren bizitza eta heriotza (Valladoliden fusilatua) azaldu dute eta Casimiro Maestro Renedoko alkate fusilatua ere izan dute gogoan, bere senideak ere bertaratu baitura ekitaldira. Valladolideko memoria historikoa lantzen duen taldeari ere eman dizkiote eskerrak, Egaña topatzen eta identifikatzen laguntzeagatik.
Berez, Julio del Olmo, Asociación para la Recuperación de la Memoria Histórica de Valladolid (ARMHV) elkartearen burua, ezin izan da bertaratu, gaixotu delako, baina eskutitza bidali du eta irakurri dute. Txomin Egiluz, Markel Iturrizar eta Edurne Ellakuriaren ikerketa ere balioan jarri du alkateak. Halaber, oroigarriak oparitu dizkiete Egañaren senideei.
Ezenarrok, bere aldetik, azpimarratu du Gogora Institutuko DNA bankuan laginak uzteko garrantzia. Izan ere, horrela identifikatu dute Egaña. Tamalez, orain arte berreskuratutako 350 errepresaliatuen gorpuzkinen artean, 50 kasutan, gutxi gorabehera, lortu dute identifikazioa burutzea.
Egañaren konpromisoa goraipatzeko baliatu dute ekitaldia, eta bakearen aldeko aldarria ere egin dute, Gaza eta Palestinako egoera ahaztu gabe.
Eusko gudariak abestuta amaitu dute omenaldia. Orain, gudariaren senideek hilerrian duten hobian sartuko dituzte gorpuzkinak, bere anaiarekin batera.